Ինչպես Aravot.am-ին տեղեկացրեց Գյումրու նորաբաց բժշկական կենտրոնի տնօրեն Արմեն Իսահակյանը, առաջիկայում իրենց հիվանդանոցը ազգաբնակչությանը ծառայություններ կմատուցի նաև պլաստիկ վիրահատությունների գծով:
Այստեղ կանցկացվեն ինչպես պլաստիկ և ռեկոնստրուկտիվ վիրահատություններ`ճաղատության շտկում` նոր տեխնոլոգիայի կիրառմամբ, դեմքի երիտասարդացում ոսկե թելերի միջոցով, քթի, ականջների, շրթունքների ձևափոխման վիրահատություններ, այնպես էլ ինտիմ վիրահատություններ` կրծքագեղձի, առնանդամի չափի և ձևի շտկում և այլն:
Իհարկե, այս ամենը նորություն է Գյումրու բժշկության պատմության մեջ, սակայն առավել նորություն է այն, որ աշխատանքի է հրավիրվել այն պլաստիկ վիրաբույժը, ով մարդկանց սեռափոխ անելու պրակտիկա ունի: Նա, ըստ Արմեն Իսահակյանի, վիրահատել է տրանսսեքսուալների՝ նրանց կամքով դարձնելով լիարժեք կին կամ տղամարդ: Վերջինս երիտասարդ պլաստիկ վիրաբույժ, բժշկական գիտությունների թեկնածու Կարեն Պետրոսյանն է, ով ներկայումս աշխատում է Երևանի Մխիթար Հերացու անվան պետական բժշկական համալսարանի պլաստիկ ռեկոնստրուկտիվ վիրաբուժության և միկրովիրաբուժության ամբիոնում ` համալսարանական թիվ 1 հիվանդանոցային համալիրում: Ըստ Գյումրու հիվանդանոցի տնօրենի, նա հանրապետության երկրորդ քաղաքում կաշխատի իրավական պայմանագրով, այսինքն կվճարվի քաղաքացիական ծառայություններ մատուցելու դիմաց:
Նունե ԱՐԵՎՇԱՏՅԱՆ
Կարդացեք նաև
